Page:Madeleine de Scudéry - Clélie, histoire romaine - Volume 01.pdf/64

parler pour le ſuplier d’enuoyer quelques-vns des ſiens pour ſecourir vne Fille de tres illuſtre naiſſance qu’on enleuoit ; ce Prince s’affoibliſſant tout d’vn coup, perdit la veuë, & la parole : ſi bien qu’Aronce n’eſtant pas alors eſcouté par ceux qui eſtoient aupres de ce Prince, parce qu’ils ne ſongeoient qu’à le ſecourir, ſe vit en vn pitoyable eſtat. De ſorte que pour faire du moins tout ce qu’il pouuoit ſans conſiderer qu’il eſtoit bleſſé, & ſans ſe ſoucier de la douleur qu’il ſentoit, il fut au pas ſuiuy de ſon Amy & des ſiens, iuſques au Lac, pour voir s’il verroit encore les Barques qu’il auoït veuës. Mais comme le ſoir aprochoit, il s’eſtoit leué vn broüillars ſi eſpais ſur ce grand Lac, qu’à peine voyoit on les Iſles qui y ſont, bien loin de pouuoir voir deux petites Barques. Si bien que ce malheureux Amant de-