Page:Madeleine de Scudéry - Clélie, histoire romaine - Volume 01.pdf/560

nous trouuer vn Aſile, ſi apres luy auoir aſſuré de luy porter la Teſte de Clelius, nous luy manquions de parole ? Vous pouuez iuger Madame, quelle ſurpriſe fut celle d’Aronce, d’entendre ce que diſoit cet Inconnu : cependant quoy que Clelius vinſt de luy dire la plus dure choſe du monde, il ne le regarda point en cette occaſion comme vn homme qui le banniſſoit, qui l’eſloignoit de Clelie, & qui le rendoit tres malheureux : & il ne le conſidera que comme le Pere de ſa Maiſtreſſe, à qui il deuoit toutes choſes. Si bien que preſtant attentiuement l’oreille pour entendre ce que ces Inconnus diroient encore ; il entendit que celuy qui eſcoutoit le premier qui auoit parlé, luy reſpondit en ces termes. Ie ſçay bien ſans doute, luy dit-il, que Tarquin eſt le plus violent homme du monde : & que haïſſant aſſez