Page:Madeleine de Scudéry - Clélie, histoire romaine - Volume 01.pdf/520

croyent-ils eſtre bien riches de ſageſſe : & vous pretendez que tous les Romains ſoient ſages. Croyez moy Clelius, ſi vous vouliez bien chercher dans vos vieilles Chroniques, vous trouueriez qu’il y a eu des vices à Rome dés ſa naiſſance : & que s’il y a de la difference des Romains aux autres, c’eſt que leur vertu eſt plus ſauuage, & plus rude ; & ie ſuis fortement perſuadée, puis que ie ne vous perſuade point, que la qualité dominante des Romains, eſt l’opiniaſtreté : puis que ſi cela n’eſtoit pas, vous vous rendriez à mes raiſons, à mes prieres, & à vous meſme : car ie ſuis aſſurée que durant que ie vous ay parlé d’Aronce, voſtre cœur vous a dit plus de cent fois que i’auois raiſon, & que vous auiez tort. Clelius entendant parler Arricidie, dont il connoiſſoit la franchiſe, ne voulut plus diſputer contre elle : &