Page:Madeleine de Scudéry - Clélie, histoire romaine - Volume 01.pdf/263

pendant Clelius pretend ne marier ſa Fille, que quand il retournera à Rome : ou du moins de ne luy faire eſpouſer qu’vn Romain. Si bien que par ce moyen, il faut de neceſſité qu’il veûille donner la plus belle & la plus parfaite Perſonne de la Terre, à vn criminel banni : ou tout au plus à vn malheureux exilé. Iugez donc ſi i’ay ſuiet de me pleindre de Clelius ; & ſi ie n’ay pas lieu de croire, qu’il faut que luy, ou Clelie, ayent vne auerſion ſecrette pour moy qu’ils n’oſent me teſmoigner, parce qu’ils ſont ſous ma puiſſance. Mais pour empeſcher qu’ils ne l’eſprouuent telle qu’elle eſt, pourſuiuit-il, ie vous coniure quand vous en trouuerez l’occaſion, de taſcher de leur faire prendre de meilleurs ſentimens ; de peur de me forcer à en prendre à mon tour, qui ne leur ſeroient pas agreables. Le Prince de Numidie entendant parler Ma-