L’original d’icelle attestation est entre les mains de mons. de la Renaudière, médecin à Caen, et l’original de celle qui en est escritte à monsieur de Pierrefitte par le sr de la Renaudière est entre noz papiers.
Le duc de Biron et le conte d’Auvergne furent quelques mois prisonniers en la Bastille ; et au duc de Biron particulièrement se faisoit le procès par la court de Parlement de laquelle la longueur ne contentoit pas Sa Majesté. Il y paroissoit de plusieurs menées, par fortes conjectures, quelques tesmoignages aussy et mémoires, mais qui contrebattus de la considération de ses services et de l’infamie de ses accusateurs, suspendoient les espritz des juges ; mais se couppant soy mesmes en ses défenses, il osta aux plus indulgens le moien de l’espargner, dont il fut condemné à avoir la teste tranchée[1] et par grâce touteffois que l’exécution s’en feroit en la Bastille et non, selon la coustume, en Grève. Il attendoit jusqu’à la fin la clémence du Roy, laquelle luy manquant, ne monstra qu’un transport de fureur, sans résolution, laissant ung exemple à tous qu’il faut tout autre courage et toute autre discipline à bien mourir qu’à tuer les autres. Le conte d’Essex quelque temps auparavant avoit esté exécuté en Angleterre, pour avoir entrepris sur aucuns[2] du conseil de la Royne Élizabeth qu’il estimoit autheurs de sa disgrâce ; en la mort duquel il avoit paru que c’est de la résolution d’un chrestien au supplice au regard de la
