Plessis, lui disant qu’un frère Jacques Clément auroit tué un meschant roy en France, dont il seroit maintenant glorieux entre les anges, que celuy qui tueroit monsieur du Plessis, qui faict tant de mal à l’Eglize, ne feroit ni ne mériteroit pas moins, et en tout cas seroit glorieux martyr ; luy auroit désigné le moyen qu’il auroit à tuer, scavoir qu’il le falloit tuer ou au temple, ou entre le chasteau et le temple, ce qu’il avoit promis d’exécuter ; et en ceste intention, au lieu de retourner en Italie, seroit venu en France par Amiens, Rouen, Evreux, le Mans, Mayenne, Fougères, Rennes, Nantes, Angers, prenant partout lettres recommendatoires des Evesques ou de leurs grandz vicaires, desquelles de faict il estoit saisy ; et sur ce sera remarqué que du Mans il tourna à Nantes au lieu de venir droict à Saumur ; ne pouvoit estre sans mystère, et qu’il y devoit avoir et prendre quelque adresse, comme de faict cette circonstance entre le chasteau et le temple ne pouvoit venir de sy loin, joinct qu’en ce temps se tenoit le chapitre général des cordeliers à Nantes, et que lors qu’il commencea à parler sur la question, quelqu’un entendit qu’il avoit premièrement nommé Nantes, lequel il avoit changé tout aussy tost, la douleur luy estant relaschée avec la corde.
Qu’en ceste intention, estant en l’hospital du Mans, il se seroit associé de Nicolas Girard, paravant recors d’un sergeant, et en l’hospital d’Angers de Matthieu Roland, jeunes hommes nécessiteux, les obligeant à luy de loin et les préparant à cest acte, duquel il se seroit finalement ouvert à eux approchant de Saumur, et en l’hospital dudit lieu, les y
