Mourut aussy le 15 de Février, au dit an, en ce chasteau de Saumur, Philippe de Jaucourt, aisné de mon filz de Villarnoul, n’ayant que huit moys, après avoir longuement languy. Fut trouvé que les grandes saignées de sa mère, lors de sa grossesse, nécessaires touteffois, en estoient en partie cause, et fut enterré dans le temple que nous avons donné en ceste Eglize. Leur nasquit en ceste mesme année, au mesme lieu, pour consolation Catherine de Jaucourt, le 18e jour du mois d’Aoust, laquelle eust pour parrain monseigneur le duc Jehan Léon des Deux Pontz, fils aisné de monseigneur le duc Jehan et Catherine de Parthenay, vicontesse de Rohan, Princesse de Léon, etc., s’estant rencontrez en ce lieu pour y traicter le mariage de Damoyselle Catherine de Rohan avec le dit seigneur duc, pour lequel faciliter monseigneur le duc Jehan des Deux Pontz, père, avoit escrit fort affectionnéement à monsieur du Plessis et s’en estoit principalement addressé à luy, et y fut la chose acheminée à assés bonne fin.
Le mois de Décembre, le… accoucha ma fille de la Verrie d’une fille, laquelle pria nostre filz, son frère, de présenter au baptesme avec mademoyselle de Tourode qui en fut marraine, et la nomma Suzanne ; ce fut en son voyage de Normandie dont il sera parlé cy après ; mais peu après son retour qui fut en Février 1602, nous eusmes nouvelles de mon filz et ma fille de la Verrie qu’elle estoit morte.
L’an 1602 commencea par un faict estrange ; le 13e de Janvier, un jour de Dimanche, monsieur du Plessis estoit au presche, en la ville, et parce qu’il avoit eu la coqueluche, je luy avoy faict couvrir sa
