duit particulièrement par le sieur La Jaunage de Mirebolaiz qui avoit faict ce voyage avec luy, déposé en attendant en nostre maison du Plessis.
Le 21e d’Avril 1606, arriva le corps de nostre pauvre filz que nous avions envoyé quérir, qui nous fut amené et conduit par le sieur de Licques, le capitaine la Roche, et quelqu’un des domestiques de nostre filz ; fut conduit par eux du Plessis au fauxbourg de la Croix vert de Saumur. Les magistratz, pour monstrer les effects de leur bonne volonté qu’ilz portent à monsieur du Plessis, et à l’honneur de la mémoyre du pauvre défunct, avoient proposé quelques jours auparavant à monsieur du Plessis et mesme prié qu’il trouvast bon qu’ilz allassent recueillir le corps avec tout le peuple, tant d’une que d’autre religion, à la Croix vert, ce qui fut faict par tous les magistratz, officiers du Roy, et tout le peuple ; et fut porté depuis le dit fauxbourg, jusques à la maison de ville de Saumur par le dit sieur de Licques et capitaines de la garnison et par les eschevins et officiers de la ville. Puis, s’estant séparés les officiers du Roy à cause de la religion contraire, fut receu en la ditte maison de ville par ceux de la Religion, et d’icelle porté au temple de l’Eglize réformée par les susdictz sieur de Licques et capitaines, et par les anciens de la ditte Eglize, et là mis en son repos au lieu destiné par nous à cest effect.
Ordonnans selon que Dieu nous appellera, d’y estre pozés après, et auprès de luy, puisqu’il a voulu qu’il y soit pour prémices, afin qu’en ce grand jour, tous ensemble par la grâce de Dieu, en Jésus Christ son bien aymé, nous resuscitions en sa gloire.
