faict ouverture par laquelle ilz entrent, mais non sans confusion, parceque le second pétard estoit destiné avec son pont faict exprès pour la porte, et celuy qui suyvoit n’estoit de mesme ; avint que le pétardier allant quérir le troisième, cria : « Retirés vous » pour se faire faire place, ce qui par les moins asseurés est interprété à retraicte, lesquelz aussy tost laissent la place vuyde. Là, nostre filz qui estoit sur le bord du fossé, s’escriant l’espée à la main pour les rallier auprès de luy, est frappé à la poitrine et au cœur d’un coup de pièce, qui tombe sans jetter un seul souspir ; et du mesme coup, La Grise, l’un de ceux qui l’appuyoient , blessé à mort, et à l’instant retiré et porté au gros qui aussy tost fit sa retraicte. Heureuse fin à luy né en l’Eglize de Dieu, eslevé en sa crainte, remarqué en cest âage de tant de vertu, en une juste querelle, en une action honorable ; mais à nous, commencement d’une douleur qui ne prend fin que par la mort, ne trouve consolation qu’en celle que Dieu nous donnera par sa grâce en sa crainte, et à remascher en attendant eeste amertume.
Monsieur le Prince Maurice eut soin de faire enterrer les entrailles en la ville de Wesel, portées par les colonelz des gens de guerre de toutes les nations, l’armée en bataille devant la ville, parceque la neutralité ne luy permettoit d’y entrer, avec les solennitez accoustumées aux exèques[1] d’un notable chef, encore qu’il n’estoit que particulier en l’armée ; et de mesmes fut conduit son corps jusques au bateau
- ↑ Obsèques.
