quement que le Roy ne trouveroit pas bon qu’il ne se fust point trouvé à Chastellerault pour l’y servir, comme quelques autres, qu’il couroit certains mémoyres sous son nom dont il ne le vouloit pas garantir que S. M. ne se trouvast fort offensée, mais M. du Plessis en escrivit aussy tost à S. M. et particulièrement à M. de Villeroy, remonstrant qu’il ne s’y estoit point trouvé parce qu’il n’y avoit point de charge, que M. de Rosny mesme ne l’en avoit point requis, et, s’il l’eust faict, qu’on y eust donné quelque mauvaise interprétation, comme à ses meilleures actions, et maintenant luy estoit bien dur ; que son respect luy fust imputé à crime ; pour les mémoyres qu’il en avoit envoyés, et ne les désavoueroit point, quand on les luy feroit voir, et quand il plairoit à S. M. de se les faire lire, comme il l’en supplioit très humblement ; qu’en y procurant le bien des Eglizes, dont il ne peut estre blasmé veu sa profession. Elle trouveroit qu’il n’y avoit rien oublié de ce qui regardoit le service de S. M. et le bien de son Estat ; à quoy luy fust respondu que S. M. n’avoit jamais attendu autre chose de son ancienne fidélité, et qu’au retour de M. de Rosny, on luy feroit plus ample responce là dessus, ce qui touteffois ne se fit point.
L’yssüe fut telle que, de quinze provinces, les treze nommèrent monsr de la Case pour y présider, gentilhomme qualifié de la maison de Pons en Saintonge, et n’y eut que deux voix pour y faire présider M. de Rosny ; mesme fut à son occasion exclus monsr de Parabère, lieutenant général en la province, non sans grand mescontentement ; que S. M.
