esté faict response qu’il n’y avoit moïen de les en accommoder, parce qu’on estoit hors d’espérance d’avoir le dit sr Couet, et par ainsy demeuroit encor ceste place vuide à son grand regret.
Au synode pational de Gap, monsr du Plessis envoya mémoires de ce qu’il estimoit concerner le repos et conservation de noz Eglizes ; la somme estoit que le Roy fust très humblement remercyé du soin qu’il avoit eu de faire establir et observer son Edict, et néantmoins remonstrer à S. M. en quantes façons on s’appercevoit de la continuation de l’animosité es peuples, quand ceux qui avoient dessein de troubler sa personne et son Estât ne pensoient trouver prétexte plus plausible que de les prendre à partie : ce qui se seroit de naguères veu en la conspiration du duc de Biron, comme il auroit pieu à S. M. mesme le leur faire entendre ; quand aussy depuis peu S. M. avoit esté griefvement malade, conseils avoient esté tenus en plusieurs villes du royaume de ce qu’on avoit à faire de ceux de leur profession, en cas que Dieu eust retiré S. M., où il auroit esté pris des résolutions sanglantes et qui ressentoient encor les passions du temps passé ; dont on leur auroit bien faict connoistre combien ilz avoient à prier Dieu pour sa longue vie ; partant fust S. M., avec toute soumission, suppliée de vouloir redoubler tant plus sa protection et sauvegarde sur elles qui ressentoient, et pour le présent et pour l’avenir, en avoir plus de besoin que jamais. Tout cela tendant à faire connoistre à S. M. leur condition, et la nécessité de leur continuer les moïens sans lesquelz ilz se sentoient exposés en proie, afin que, lorsque le temps
