Sous dous vis riant & gay,
Trop plus dous que roſe en may,
À oudorer.
Et, ſe je puis eſperer,
Qu’elle me daignaſt amer,
J’oublieray
Tous maus, ainſi gariray,
Mes dous penſer.
Si ne doi pas tant doubter
Les maus que tray.
Je ne me puis ſaouler…
IV. — Ma tres-chiere & ſouveraine dame, je vous remerci, tant humblement comme je puis, de vos douces, courtoiſes & amiables eſriptures. Car vraiement je y preng grant plaiſance, grant confort & grant deduit, toutes les fois que je les puis veoir, oÿr & tenir ; & certes je vous en doy bien mercier ; car elles font & ont faict plus grans miracles à ma perſonne que je ne vi onques faire n’à ſaint n’à ſainte qui ſoit en paradis. Je eſtoie aſſourdis, arrudis, mus, impotens,[1] par quoy joie m’avoit de tous poins guerpi & mis en oubli ; mais vos douces eſcriptures me font oÿr & parler, venir & aler, & m’ont rendu joie qui ne ſavoit mais où je demouroie. Mais orendroit elle fait ſa droite manſion enmi mon cuer ; ſi que je ſuis de tous poins garis, la merci Nre Seigneur & la voſlre, fors ſeulement Deſirs qui ne me laiſt durer. Mais la tres-douce eſperance que j’ay de vous veoir vainc de tous poins mon deſir, me garit de toutes dolours & me fait avoir toute joie. Que ſeroit-ce, ſe je pooie bien mes yeuls & mon cuer ſaouler de vous veoir ! Certainement, tuit cil qui ſont & qui ſeront & qui ont eſté ne pourroient penſer, ymaginer ne conſiderer en cent mille ans la centiſme partie de la joie que je aroie. Et ce ſera brieſment, ſe Dieu
- ↑ J’étois devenu lourd, groſſier, muet, impotent,