Je le pris à grant reverence ;
Et ſi, le baiſay ſans doubtance
Plus de cent fois ou environ.
Et puis j’oſtay mon chaperon,
Et devant lui m’agenouillay
Ne de moy pas ne l’eſlongnay ;
Ains le garday tres-doucement
Sus mon cuer, & ſongneuſement ;
Et ſouventes ſois le baiſoie,
Car trop grant plaiſance y prenoie.
Et pour ce que ſi noble choſe
Ne doit celée eſtre n’encloſe,
Vous diray, ſans oſter ne mettre,
Ce qu’il y avoit en la lettre.
Celle qui onques ne vous vit,
Et qui vous aime loiaument,
De tout ſon cuer vous fait preſent ;
Et dit qu’à ſon gré pas ne vit,
Quant véoir ne vous puet ſouvent
Celle qui onques ne vous vit,
Et qui vous aime loyaument.
Car pour les biens que de vous dit
Tous li mondes communement,
Conquiſe l’avez bonnement.
Celle qui onques ne vous vit
Et qui vous aime loyaument,
De tout ſon cuer vous fait preſent.[1]
- ↑ On voit par cet exemple comment la forme du Rondeau s’eſt modifiée. On ſe contenta, à partir du ſeizième ſiècle, de prendre pour refrain les premiers mots des premiers vers qu’on répétoit entiers auparavant. Ainſi l’on eut dit ſeulement : Celle qui vous, & dans la répétition
