Page:Machaut - Le Voir Dit, 1875.djvu/404

348

[vers 8551]

LE LIVRE

Ne qu’en un mahommet de croie.^[1]
Si ne demoura pas quinzeinne
Qu’en un lundi, à bon eſtreinne,
Un mien amy qui eſtoit preſtres,
Et en l’art de logique maiſtres,
Vint à moy & me ſalua,
Et moult ſagement m’argua ;
En diſant que trop meſprenoie,
Qu’ainſi legierement créoie,
Eſpecialement vers ma dame :
Et me jura ſon corps & s’ame
Que dit toute s’entencion
Li avoit en confeſſion ;
Mais bien vouloit & li plaiſoit^[2]
Dou dire à moy, & li loiſoit.
Lors me diſt qu’onques ne fauſſa
Vers moy, ne fauſſer ne penſa,
En fait n’en deſir n’en penſée,
Ne que jà de moy deſſevrée
Ne fera s’amour ne ſa grace,
Pour choſe qu’elle die ne face.
Et que, pour Dieu, que plus ne vueille
Souffrir que ſi grieſment dueille ;^[3]
Car tant pareſt deſconfortée,
Laſſe, dolente & eſplourée,
Cils me jura Saint Eſperit,
Que c’iert pechiés s’elle perit.

Quant il ot dit tout ſon plaiſir,

1. Une idole (ou Mahomet) de craie.
2. La dame vouloit & deſiroit… & elle le lui permettoit.
3. Et que, pour Dieu, il ne la laiſſe ſouffrir plus longtemps.