tenir de joie, quant je les tins ; tous li cuers m’efvanuy : de quoy moult de teles dames avoit avecques mi[1] qui ſe mervillierent que j’avoie : & toutesfois li cuers me revint, & m’en alay en ma chambre, diſant que je m’aloie repoſer un po. Et chaſcuns s’en ala, & me laiſſierent, car il cuidoient que je fuiſſe moult malade : & ſi eſtoie-je. Et fermay ma chambre, & leu vos douces lettres, & entendi bien tout le fait & ſceu la vérité de nos .ii. cuers qui jamais ne porront desjoindre ; car je voy bien & enten que l’un porroit po vivre ſans l’autre. Si eus, en liſant, moult de biens & moult de maus, mais je les ſouſtien bien, & me ſont moult dous. Si ſachiés bien, mon dous cuer, que j’ay pris & veu le lay qui eſtoit enclos en voſtre douce lettre, & vous promet que je le ſaray au plus toſt que je porray, & ne chanteray autre choſe juſques à tant que je ſache le dit & le chant : Car c’eſt choſe de dit & de chant qui onques plus me plaiſt. Mon tres-dous amis, Noſtre ſeigneur vous doint bonne ſanté, pais & tele joie comme voſtres cuers & li miens mieus le deſirent.
Mais je vous ay autre fois dit,
Si com il apert par mon dit,
Que cils qui ſent l’amoureus point
N’eſlt mie touſdis en un point :
Ainçois reçoit mainte pointure,
Une heure douce, l’autre ſure.
Et Deſirs qui a mis à mort
Maint amant, deſiroit ma mort,
Et en tous lieus me couroit ſeure.
En tous eſtas, & à toute heure.
Si ne le pooie endurer,
- ↑ Il y avoit avec moi telles nombreuſes dames qui, &c.