Et elle à moi. Que vous diroie ?
Dont cy mettre enhardir ne m’os,
Car il n’i avoit que .ij. mos ;
Et pour ce ſeulement m’en tais,
Car d’autre choſe ſui entais.[1]
Si fis en alant ces .ii. choſes
Qui en ce livre ſont encloſes.
Vos penſées me ſont commandement,
Si feray ce que vos cuers me commande ;
Quant j’oy & voy voſtre dous mandement,
Vos penſées me ſont commandement.
S’amours me doinſt joie & amendement
De vous, à qui mon vrai cuer recommande !
Vos penſées me ſont commandement
Si feray ce que vos cuers me commande.
Amis, venés vers moy ſéurement,
Car il n’eſt riens où tant mes fins cuers tende ;
Véus ſerés tres-amoureuſement ;
Amis, venez vers moy ſéurement.
Et ce vous jur & promet loyaulment
Que pour vos maus faut que joye vous rende.
Amis, venés vers moy ſéurement,
Car il n’eſt riens où tant mes fins cuers tende.
- ↑ Être entais, avoir en tâche, être chargé.