Qui se sont a un corps[1] fermées,
Celle qui vient[2] premierement,
Elle attrait le commencement
Dès[3] ce point par[4] la premerainne,
Pour ce que c’est la souvereinne ;
Et qui la première osteroit,
La seconde s’en partiroit.
Or puelent[5] dire tel y a :
« Guillaume, verbi gracia,
A entendre[6] si comme quoy ? »
Vesci en l’eure le pourquoy :
Nous vëons un chien qui enrage,
De quel cause li vient la rage ?
D’un ver qui la langue li perse.
Or est la cause si desperse[7]
Qu’il pert le[8] boire et le mengier,
Et puis le convient enragier.
Or est dont li commencemens
De quoy vient li enragemens.
Et quant il en pert l’abaier,
Adont se puet on[9] esmaier
Dès[10] ce point, que la gent ne morde.
Et que[11] de ce mieus nous remorde[12],
Je vous en diray qu’il avint
D’un chien qui enragiez[13] devint,
Amez en l’ostel d’un riche homme.
Or entendez, s’orrez la somme.
Li riches homs ot oÿ dire
Dont venoient[14] si fait martire[15] ;
S’en vout vëoir[16] l’expérience
Page:Machaut - Œuvres, éd. Hœpffner, I.djvu/324
Le texte de cette page a été corrigé et est conforme au fac-similé.