« Hé! douce mère[1], je m’en vois.
A Dieu vous commant, douce dame ! »
Et droit a ce point rendi l’ame[2].
Elle[3] fut de la gent criée,
Et sa mère en fu tourmentée.
De ce ne tieng[4] je pas mon[5] compte[6],
Car a mon propos[7] riens n’en monte.
« Guillaume, ou porrez[8] vous trouver
Comment vous peüssiez prouver[9]
Qu’uns homs seroit a mort menez
De ce point que vous soustenez,
Dou[10] forfait de sa bien amée[11],
Et que ce[12] fust chose prouvée
Qu’elle eüst fait la villenie,
Et qu’adès demourast en vie ?
De la pucelle est chose voire.
Mais ce seroit trop fort a croire
Que plus grans fust li siens meschiez
Que de celle. Bien le sachiez ! »
« Attemprance, moult bel parlez
Toutes les fois que vous volez.
Ci endroit especiaument
Avez parlé moult sagement.
Et quanqu’avez ci dit, je croy,
Ne dou croire point ne recroy[13].
Car c’est pour moy en aucun point
Qui vient a mon propos a point.
Quant celle damoiselle gente
Ot mis ou chevalier s’entente[14],
