[1]
S’en compteray un petit compte
Qui vous fera avoir grant honte,
Et a ma dame grant honnour,
Et grant clarté a mon signour,
Dont il verra plus clerement
Comment vous errez folement.[2]
« Il n’a pas lonc temps qu’il avint
Qu’une grant dame a Paris vint.[3]
S’amena une sienne fille
Qui, sans penser barat ne guille,
Amoit un chevalier gentil,
Sage, courtois, gay et soutil,
Preus aus armes, fort et puissant,[4]
De toutes graces souffissant.
De lui nouvelles li venirent
Qui forment au cuer la poingnirent[5]
Qu’il estoit a un tournoy mors.
« Lasse ! » dist elle, « quel remors[6]
Puis avoir de ceste nouvelle ! »
A cest mot cheÿ la pucelle[7]
A la terre, toute estendue.
Adont sa mere y est venue
Acourant moult dolentement ;
S’en prist a plourer tenrement[8]
Et la fist porter en un lit.
La prist elle povre delit ;[9]
Car au cuer estoit fort ateinte[10]
Et ou viaire pale et teinte
Et si de son corps amatie
Et de ses membres amortie,
Page:Machaut - Œuvres, éd. Hœpffner, I.djvu/297
Le texte de cette page a été corrigé et est conforme au fac-similé.