Page:Machaut - Œuvres, éd. Hœpffner, I.djvu/179

Mais envoisiez et reveleus estoie,^[1]
Jolis et gais, trop plus que ne soloie ;
          680 Et c’estoit drois^[2]
Qu’a mon pooir fusse gens et adrois,^[3]
Car par cuidier estoie en tous endrois
Li mieus amez des amans et il rois.
          684 Mais quant Fortune,
La desloial, qui n’est pas a tous une,^[4]
M’ot si haut mis, com mauvaise et enfrune,^[5]
Moy ne mes biens ne prisa une prune ;
          688 Eins fist la moe,
Moy renoia et me tourna la joe,^[6]
Quant elle m’ot assis dessus sa roe,
Puis la tourna, si cheï en la boe.^[7]
          692 Mais ce fist elle,
La traître, toudis preste et isnelle^[8]
De ceaus traïr qu’elle met dessous s’elle,^[9]
Pour ce que Dieus et Nature la belle,
          696 Quant il formèrent
Celle que j’aim, si fort se délitèrent^[10]
En la très grant biauté qu’il li donnèrent
Que loyauté a mettre y oublièrent.^[11]
          700 Et bien y pert ;
Que je say bien et voy tout en apert^[12]
Que ma dame, qui tant a corps apert.
Que mes cuers crient, aimme, obeist et sert,
          704A fait ami
Nouvellement, sans cause, autre que mi.^[13]

1. EKJP renuoisiez ; CP et resueilliez ; KJ et amoureux ; D et enuoieus
2. M Et sest.
3. KJ fusse [K feisse) jeux esbanois ; E et drois
4. E que
5. E comme mauuaise enfrune ; D enfronne
6. D roe
7. K Plus ; E et chei
8. E Le traître conduis prest et ynele ; F traite ; P tous jours
9. K met dessoulz sesselle ; J met souz sesselle ; B¹ dessuz elle
10. E si bien ; E si del.
11. E Car
12. CK Car
13. E de my,