Ou cuer, quant dire li voloies ;[1]
Car Bontez, Biautez et Amour,[2]
1184 Honte, Paour et Grant Douçour
Te font par leur noble victoire
Perdre scens, manière et mémoire.
Or t’ay je dit et devisé
1188 Tout ce que tu m’as demandé.[3]
Maintenant plus ne t’en diray.
Tu demourras ; je m’en iray ;
Mais je t’apenray au partir,
1192 Se tu vues aus dous biens partir
Et estre garis de tes maus,[4]
Que secrez soies et loiaus».[5]
Einsi li dieus se départi,
1196 Qui de joie me reparti,
Pour ce qu’il me moustra la voie[6]
Comment maintenir me dévoie.
Et einsi comme il s’en vola,
1200 Tous li biaus arbrissiaus crosla,
Si qu’adont la froide rousée[7]
Est seur mon visage avalée.[8]
Que li dieus y fist dechëoir[9]
1204 Par la force de son mouvoir.
Et quant je senti la froidure
Qui chut de dessus la verdure.[10]
Elle me fist tout tressaillir,
1208 Si qu’a moy me fist revenir
Et mist hors dou transissement[11]
Ou j’avoie esté longuement.
