1120 Eins qu’il ait les biens savourez ;[1]
Et cils qui en son cuer norrit
Loyauté, Celer, le délit
Puet avoir moult legierement[2]
1124 Qu’il a désiré longuement.[3]
Lors me commanda que je fusse[4]
Loyaus, secrez, et que j’eusse
Mémoire des autres vertus
1128 Qu’il m’avoit moustré par dessus,
Se je voloie ja joïr[5]
De ce que j’aim tant et désir ;[6]
Et dist que, s’einsi le faisoie,[7]
1132 Que de riens ne me mefferoie.
Et que, se loyal esprouver
Me pooit et secret trouver,
Que de ma dame convertir
1136 Feroit le cuer et adoucir,[8]
Si que ma doleur cesseroit
Et ma grant joie doubleroit,[9]
Et que je seroie aligiez
1140 Des maus dont mes cuers est chargiez.
Mais encor dist il, sans attendre.[10]
Qu’il me voloit dire et aprendre
Comment einsi perdus estoie,
1144 Quant ma douce dame vëoie.
Lors me dist qu’il n’est nuls vivans
Qui soit amis, s’il n’est doubtans ;[11]
Car on doit sa dame doubter,
1148 Et li de courrons eschever,
N’on ne li doit dire ne faire
Chose qui li puisse desplaire.
