Valent bien biauté, ce me samble.
Et s’il est po riches d’avoir[1]
Ou d’amis ou de grant savoir,
Je l’enrichi de loiauté[2]
Et de grant debonnaireté.
Volenté li doing d’entreprendre
Quanque cuers oseroit atendre ;
Force, hardement d’achever[3]
Li doing pour s’onneur eslever.
Par ces cinc vertus puet conquerre[4]
Grant avoir et amis acquerre,[5]
Et par ce science conquiert
De retenir ce qu’il acquiert ;
Dont li cuers li est revestus[6]
De ces cinc très nobles vertus.[7]
Par moy n’est pas trop empirez,
Car bien puet estre comparez
A celui qui tant est puissans[8]
D’avoir, de lignage et de scens.
Et s’il a en lui cuer muable[9]
Ou manière descouvenable,[10]
Fine amour le dottrinera,[11]
Et tout son cuer li muera
Honte et grant désirer de plaire[12]
A s’amie, pour grâce attraire.
Cil troi le feront par nature
Ferme, de manière meüre.[13]
Or as tu oï grant partie
Pour quoy c’est que je ne voy mie.
Mais encor vueil que tu escoutes :
Dire te vueil mes vertus toutes.
