Dou brandon de feu qui ardoit[1]
Et dou dart qui ferrez estoit,[2]
Et de quoy ses eles servoient,[3][4]
Et pourquoy cil qui la estoient,[5]
Qui estoient bel a devis
De corps, de façon et de vis,
Li darrein et li premerein,[6]
Comme a leur signour souverein,
Feste, honneur et grant révérence
Li faisoient de leur puissance.
Et quant je li eus ma prière[7]
Toute ditte en tele manière,
Moult doucement me respondi
Tantost, que plus n’i attendi,
Que moult volentiers me diroit
Tout ce, ne ja n’en mentiroit.
Si me commanda que j’oïsse
Ce qu’il diroit et retenisse ;
Car se retenir le voloie,
A honneur venir en porroie.
Lors parla gracieusement
Et dist einsi premièrement :
« Je sui cils qui a le pooir[8]
De faire le riche doloir
Et de lui faire dolouser,
Plaindre, pleurer et souspirer
Et de lui tenir en dangier,
Si que riens ne li puet aidier.
Ors, ne argens, ne grant richesse,[9]
Donner, promettre, ne noblesse,