Page:Les voyages advantureux de Fernand Mendez Pinto.djvu/88

70

Voyages Aduentureux

Mediterranée, que de l’Ocean. Ie luy parlay auſſi du commerce des habitans du pays, qui iuſques alors n’en auoient point eu encore auec les Portugais. En ſuite de cela ie luy declaray quelle eſtoit tout ceſte coſte, quels ſes ports, & quelles ſes riuieres. À quoy ie n’oubliay point d’adiouſter les ſituations, les hauteurs, les degrez, les noms, & les profondeurs des ports, ſuiuant l’ordre qu’il m’en auoit donné à mon partement. Auec cela ie luy fis vne deſcription de la rade où s’eſtoit perdu Roſado, Capitaine d’vn vaiſſeau François, & vn autre nommé Matalote de Brigas, auſſi Capitaine d’vn autre Nauire, qui par vne tempeſte de mer fut ietté dans le port de Diu, en l’an 1529. du regne de Sultan Bandur, Roy de Cambaye. Ce prince les ayant tous conuertis à la Loy Moriſque, fut cauſe qu’ils renierent leur foy iuſqu’au nombre d’octante deux, qui apres s’eſtre faits renegats, le ſuiuirent depuis en l’année 1533. & luy ſeruirent de Canonniers, en la guerre qu’il eut contre le Roy de Mogor, où ces miſerables moururent ſans qu’il en eſchappaſt vn ſeul. En outre ie luy apportay la deſcription d’vn lieu propre à l’anchrage, dans la rade Pullo Botum, où ſe perdit autresfois le Nauire Biſquain, que l’on diſoit eſtre celuy-là meſme dans lequel Magellan fit le tour du monde, & que l’on appelle le vaiſſeau Vittoria, qui trauerſant l’Iſle de Iooa, fit naufrage à l’emboucheure de Sonde. Ie luy fis auſſi recit de pluſieurs differentes nations, qui habitent le long de cet Ocean, & de la riuiere Lampon, d’où l’or de Menancabo eſt tranſporté au Royaume de Campar, ſur les fleuues de Iambes & Broteo. Car les habitans du païs affirment que leurs Chroniques font foy, qu’en cette meſme ville de Lampon, il y auoit anciennement vn Bureau de Marchands, eſtably par la Royne de Saba, dont quelques-vns tiennent qu’vn bien faicteur nommé Nauſem, luy enuoya vne grande quantité d’or, qu’elle fit depuis porter au Temple de Hieruſalem, lors qu’elle y fut voir le ſage Roy Solomon. De là meſme quelques vns tiennent qu’elle s’en reuint enceinte d’vn fils, qui ſucceda depuis à l’Empire d’Ethiopie, que nous appellons maintenant le Preſte-Iean, de la race