Page:Les voyages advantureux de Fernand Mendez Pinto.djvu/58

40

Voyages Aduventureux

luy auoit promis de bruſler la Galere dans quatre iours, & de chaſſer les Turcs de tous les confins de ſon Royaume ; dequoy le Vice-Roy fut grandement ſatiſfaict. Cependant apres que i’eus demeuré vingt & trois iours entiers dans la meſme Ville de Goa, où i’acheuay de me guerir des deux bleſſeures que i’auois receuës en combatant en la tranchée du Turc, l’extréme incommodité où ie me voyois reduit, fiſt que par le conſeil d’vn Pere Religieux, mon amy, ie m’en allay offrir mon ſeruice à vn Gentilhomme, nommé Pedro de Faria, qui pour lors eſtoit pourueu de la charge de Capitaine dans Malaca, d’abord il fut tres content de me receuoir pour ſoldat, & me promiſt auec cela que dans ſa compagnie il me donneroit quelque aduantage plus qu’aux autres, durant le voyage qu’il s’en alloit faire auec le Vice-Roy. Car c’eſtoit en ce meſme temps que le Vice-Roy Dom Garcia de Noronha faiſoit ſes preparatifs pour s’en aller au ſecours de la fortereſſe de Diu, qu’il ſçauoit aſſeurément eſtre aſſiegée, & en grand danger d’eſtre priſe, par les grandes forces que le Turc y auoit miſes deuant : ce qui fut cauſe que pour y remedier, le Vice-Roy leua à Goa vne puiſſante armée nauale, compoſée d’enuiron deux cens vingt cinq vaiſſeaux, dont il y en auoit quatre-vingt trois de haut bord, à ſçauoir groſſes Nefs, Gallions, & Carauelles, & pour le ſurplus il conſiſtoit en Brigantins, en Fuſtes, & en Galeres. Dans leſquels vaiſſeaux l’on aſſeuroit qu’il y auoit bien dix mille honeſtes gens, enſemble trente mille hommes de Chiourme, tant pour la guerre, que pour la nauigation d’vne armée ſi redoutable, ſans y comprendre vne grande quantité d’eſclaues Chreſtiens. Ce qu’il y auoit de pire en tous les preparatifs, eſtoit qu’il ne s’y paſſoit rien dequoy n’euſt aduis le Bachat General de l’armée du Turc, par les lettres que luy enuoyoient exprés Hidalcan, Camorin, Roy de Calicut, Inezamalue, Acedecan, & pluſieurs autres Princes Payens & Mahumetans, qui pour cet effet entretenoit quantité d’eſpions. Le temps de faire voile eſtant venu, & l’armée pourueuë des choſes neceſſaires, le Vice-Roy s’embarqua le Samedy quatorzieſme Nouembre 1583. Neantmoins cinq