Page:Les voyages advantureux de Fernand Mendez Pinto.djvu/217

199

de Fernand Mendez Pinto.

tous bien empeſchez, auec vne bonne partie de nos gens bleſſez, & pluſieurs morts, Dieu permiſt que le feu priſt ſi aſprement à l’vn des Iuncos des ennemis, qu’en meſme tẽps il priſt auſſi à celuy à qui il eſtoit attaché ; ce qui fut cauſe que les ſoldats quitterent le combat, pour empeſcher qu’ils ne fuſſent entierement bruſlez, ce qu’ils ne peurent faire ſi promptement, qu’vn d’eux ne fuſt raſé à fleur d’eau par la violence du feu, ſi bien que ceux de ce Iunco pour n’eſtre bruſlez, ſe ietterent incontinent dans la mer où ils ſe noyerent. Cependant nous fiſmes en ſorte d’approcher noſtre Iunco, d’vne eſtaquade de pieux, que des peſcheurs y auoiẽt plantez tout contre vn eſcueil, proche de l’emboucheure de la riuiere, en laquelle eſt à preſent le Temple des Siams, ou ſi toſt que ce chien de Coja Acem nous vit ainſi occuppez, nous ayant accroché il ſauta dedans noſtre vaiſſeau, ſuiuy d’vn grand nombre de Mahumetans tous armez de colletins de Buffle, & de jaques de maille, qui d’abord mirent à à mort plus de cent cinquante des noſtres, deſquels il y auoit dix-huict Portugais ; ce que nous n’euſmes pas pluſtoſt apperceu, que tous bleſſez que nous eſtions, & en dommagez par le feu, comme vous voyez que nous ſommes, nous cherchaſmes l’inuention de nous ſauuer, & nous iettaſmes pour cét effet dans vne Manchua, qui eſtoit attachée à la pouppe de noſtre Iunco, dans laquelle il a pleu à Dieu nous ſauuer quinze perſonnes ſeulement, dont deux moururent hier, & parmy les treize qui miraculeuſement ſont eſchappez vifs, il y en a huict Portugais, & cinq valets. Cependant nous fuſmes entre la terre & cette palliſſade approchant pres des rochers, pour empeſcher qu’ils ne nous abordaſſent auecque leur Iunco ; joint qu’alors ils ne ſongeoient point à cela, pour eſtre occupez à recueillir en leur barque les gens du Iunco bruſlé, qui s’eſtoient iettez en mer, & qui furent en fin tous ſauuez. Apres cela ils rentrerent tous dans noſtre Iunco auec vn extreme allegreſſe, & s’embaraſſerent tellement dans la conuoiſie du butin, que cela fut cauſe que nous ne fuſmes point pourſuiuis. Or pource qu’alors il eſtoit preſque Soleil couché, grande-