Page:Les voyages advantureux de Fernand Mendez Pinto.djvu/165

147

de Fernand Mendez Pinto.

traitter auec ces peſcheurs comme auec des Marchands, dautant qu’en eſchange de la grande quantité de perles qu’il y auoit en ce lieu, ils pourroient facilement debiter la plus grande partie de la marchandiſe. Cét aduis eſtant treuué le meilleur & le plus aſſeuré, Antonio de Faria fit mettre la banniere de marchandiſe, & de paix, à la couſtume de la Chine. Tellement qu’à l’heure meſme il vint à nous de terre deux Lanteaas, vaiſſeaux ſemblables à des Fuſtes, auec force rafraichiſſemens. Alors ceux qui eſtoient dedans, apres auoir fait leurs ſaluës, entrerent dans le grand Iunco où eſtoit Antonio de Faria. Mais comme ils y veirent des hommes faits comme nous, n’en ayant iamais veu de ſemblables, ils demeurerent tous eſtonnez, & demanderent quelles gens nous eſtions & ce que nous venions faire en leur pays. Alors nous leur fiſmes reſponse par vn truchement, que nous eſtions des Marchands natifs du Royaume de Siam, venus en ce lieu pour leur vendre & eſchanger auec eux la marchandiſe que nous auions, s’ils nous en donnoient permiſſion. A quoy vn vieillard reſpecté de tous les autres reſpondit, qu’oüy ; mais que le lieu où nous eſtions, n’eſtoit où l’on trafiquoit, & que c’eſtoit en vn autre port plus auant qui s’appelloit Guamboy, pour ce qu’en iceluy eſtoit la manufacture pour les Eſtrangers qui y venoient, comme à Cantan, Chincheo, Lamau, Comhay, Sumbor, Liampau, & autres villes qui eſtoient le long de la mer pour receuoir les nauigeãs qui venoient de dehors. C’eſt pourquoy il leur conſeilloit, comme au chef de ſes membres qu’il auoit ſoubs ſon gouuernement, qu’il s’en allat incontinent de-là, à cauſe que ce lieu ne ſeruoit qu’à la peſche des perles, pour le threſor de la maiſon du fils du Soleil, en laquelle par ordonnance du Tutam de Comhay, qui eſtoit le ſouuerain Gouuerneur de tout ce païs de Cauchenchina, auoient ſeulement permiſſion d’approcher les barques deſtinées pour ce faire, & que tous autres nauires qui y eſtoient treuuez, eſtoient incontinent par ordonnance de Iuſtice bruſlez auec ceux qui eſtoient dedans, qu’ainſi puiſque luy, comme Eſtranger, ignorant les Loix du pays, les auoit tranſgreſſées, non par meſpris, mais