vne maison de doüane au port de Pazem. Cét Abiſſin ſe rendit maiſtre du bouleuart, auec ſoixante Turcs, quarante Ianiſſaires, & quelques Mores Malabares, leſquels planterent cinq enſeignes, & pluſieurs guidons. Cependant le Roy d’Aaru, à force d’encourager les ſiens auec des promeſſes, & des paroles, telle que le temps preſent requeroit, fit ſi bien qu’auec vne valeureuſe reſolution ils attaquerent les ennemis, & regaignerent le bouleuart que n’agueres ils auoient perdu, de ſorte que le Capitaine Abiſſin y demeura ſur la place, auec tous ceux qui eſtoient dedans auec luy. Le Roy voulant alors s’aider d’vn ſi bon ſuccez, comme vne perſonne qui recherchoit la victoire, fit à meſme temps ouurir les portes de la tranchée, & s’eſtant mis en campagne auec vne bonne partie des ſiens, il combatit ſi vaillamment contre ſes ennemis, qu’il les mit tous en déroute. Par meſme moyen il leur prit huict des douze pieces d’artillerie qu’ils auoient deſembarquées, & ainſi il fit ſa retraite en toute aſſeurance. À l’heure meſme il ſe fortifia le mieux qu’il pût, afin de ſouſtenir plus facilement les aſſauts que ſes ennemis luy deuoient donner.
e Roy d’Achem voyant le mauuais ſuccez qu’il auoit eu en ceſte iournée, eut plus de regret de la mort du Capitaine Abiſſin, & de la perte de ces huit pieces d’artillerie, que de tous ceux qui auoient eſté tuez au combat. Il fit doncques aſſembler ſon conſeil de guerre pour prendre vne reſolution. Là-deſſus tous furent d’aduis de continuer le ſiege commencé, & d’aſſaillir la tranchée de tous coſtez, ce qui fut executé ſi promptement, qu’en dix ſept iours qu’ils y trauaillerent, ils l’attaquerent par neuf diuerſes fois, tellement qu’à force d’inuen-
