Cette page a été validée par deux contributeurs.
Quant l’uns à l’autre atalente
For coi nos as departis ?
Dex ! quant crieront outrée…
De ce sui en bone atente
Que je son homage pris.
Et quant la douce ore vente
Qui vient de cel douz païs
Où cil est qui m’atalente,
Volentiers i tor mon vis ;
Adone m’est vis que j’el sente
Per desoz mon mantel gris.
Dex ! quant crieront outrée…
De ce sui mout deçéue
Que je ne fui au convoier.
Sa chemise qu’ot vestue
M’envoie por embracier.
La nuit, quant s’amor m’argue,
La met delez moi couchier
Toute nuit à ma char nue
Por mes malz assoagier.
Dex ! quant crieront outrée,
Sire, aidiez au pelerin
Por qui sui espoentée,
Car felon sunt Sarrazin.
