Cette page a été validée par deux contributeurs.
LE LAI DE LA DAME DU FAEL
Chanterai por mon corage
Que je vueill reconforter ;
Car avec mon grant damage
Ne vueill morir n’afoler,
Quant de la terre sauvage
Ne voi nului retorner,
Où cil est qui m’assoage
Le cuer quant j’en oi parler.
Dex ! quant crieront outrée,
Sire, aidiez au pelerin
Por qui sui espoentée,
Car felon sunt Sarrazin.
Je souferrai mon damage
Tant que l’an verrai passer.
Il est en pelerinage
Dont Dex le lait retorner !
Et, maugré tot mon lignage,
Ne quier ochoison trover
D’autre face mariage :
Folz est qui j’en oi parler.
Dex ! quant crieront outrée…
De ce sui au cuer dolente
Que cil n’est en cest païs
Qui si sovent me tormente ;
Je n’en ai ne jeu ne ris.
Il est biaus et je suis gente.
Sire Dex ! por quel féis ?
