Tous accordz ferons
Au nombre de sept.
Se silvanus ne dort dedans ses boys,
Oyant noz voix, il viendra de grant tire.
Avril s’en va, mais May doulx et courtois
Prince des moys, fait si joyeulx exploictz
Que venir veois maint faune et maint satire,
Et je Tytire exempt de tout martire
Vers eulx me tire : Et j’oz Pan que jay chier.
Echo respond a lendroit dung rochier.
Bergiers, on verra
Qui mieulx le fera,
Qui n’esblouyra
De veoir Aurora
Quant elle resplent,
Pan qui là sera
Nous conjouyra.
Chascun luv donra
Loz tel quil pourra
Et bruyt excellent.
Galathee bergiere belle
Cy endroit Auvergne sappelle.
Arbres fueillez[1] revestus de verdure
Quant lyver dure, on vous voit desolez,
Mais maintenant aucun de vous nendure
Nulle laidure, ains vous donne nature
Riche paincture et flourons a tous lez,
Ne vous branlez, ne tremblez, ne crouslez
- ↑ Feuilluz (1548).
