Ysengrins a un fils o soi
Qui toz jors de mal faire a soi ;
S’a non Primaut ;
Renars, un qui a non Grimaut ;
Poi lor est comment ma rime aut,
Mès que mal facent,
Et que tous les bons us esfacent.
Diex lor otroit ce qu’il porchacent !
S’auront la corde ;
Lor ouvraingne bien s’i acorde,
Quar il sont sanz miséricorde
Et sanz pitié,
Sanz charité, sanz amistié.
Monseignor Noble ont tot getié
De bons usages ;
Ses ostex est uns reclusages.
Assez font paier de musages
Et d’avaloingnes
A ces povres bestes lontaignes,
A cui il font de granz essoingnes.
Diex les confonde,
Qui sires est de tout le monde !
Et je r’otroi que l’en me tonde
Se maus n’en vient ;
Quar d’un proverbe me sovient
Que l’en dit : Tot pert qui tot tient ;
C’est à bon droit.
Page:Le Roman du Renart, supplément, 1835.djvu/74
Le texte de cette page a été corrigé et est conforme au fac-similé.
![](http://upload.wikimedia.org/wikipedia/commons/thumb/9/92/Le_Roman_du_Renart%2C_suppl%C3%A9ment%2C_1835.djvu/page74-1024px-Le_Roman_du_Renart%2C_suppl%C3%A9ment%2C_1835.djvu.jpg)