Ne ceulz qui leur vont sermonner
La loy que Diex leur voult donner.
Dist le riche : Par vérité,
Eulx croiront en resuscité,
Ce m’est avis, se il leur raconte
Les maulz que seuffre et la grant honte.
Abraham dist : Quant eulz ne creurent
Les prophésies si comme eulz durent,
Jà ne croirons mort qui revive.
Ainsi l’un d’eulx à l’autre estrive ;
Mez cil qui fu povre jadis
Sera tousjours em paradis,
Et en enfer le mauvez riche
Sera touzjours come la brice ;
Car l’un ne peut à l’autre aler,
Ne haut monter, ne devaler,
Si comme saint Lucas tesmoigne,
Qui nous escrit ceste besoigne.
En aucun cas est convenable
Ceste euvangile et ceste fable.
Donc soit Regnart atout sa guille
Condampné par ceste euvangille
Ovec les feus[1] par avarice,
Comme cestui qui par son vice…
Le reste manque.
- ↑ Fels, félons.
