Le peschier lait et si s’areste ;
Un petitet se trait arrière,
Et quant il vit que c’est feuchière,
Aval l’enpoint et puis repesche.
Renars séoit sor l’erbe fresche,
Si a à ses dens esrachie
De la fouchière une brachie ;
Il la gete en l’ewe courant,
Et si ne va pas demorant.
Li Hairons se r’est tressallis,
Qui bien cuide estre malbaillis ;
De la feuchière se raproche,
Des piés et de son bec l’atouche
Et reverse en mainte manière ;
Et quant il voit que c’est fouchière,
Derechief conmence à peschier,
Et les poissons al bec cerchier.
Renars estoit en son agait,
Bien a véu quanqu’il a fait ;
De lecherie se débrise,
Et se porpense en mainte guise
Conme il le puisse damagier,
Et de la rivière sachier.
Mais il dist qu’en l’ewe enterra,
Et en aventure se metra ;
Envolopés en la fouchière,
Si flotera, qu’ele est ligière ;
Assés porront bien estre ensamble,
Page:Le Roman du Renart, supplément, 1835.djvu/42
Le texte de cette page a été corrigé et est conforme au fac-similé.
