Page:Le Roman du Renart, supplément, 1835.djvu/157

Et te pendras à cele corde,
Et li angle t’enporteront,
Qui de toi grant joie feront.
Tant li dist Renars et consele,
Et tant li a mis en l’orelle
A Ysengrin, qu’il s’aparelle
Pour prendre la corde et la selle.
Il ne douta, si fist enfance ;
La nuit i prist male froviance.
A la corde se tient et lace
Ysengrins, et la selle embrace,
Puis s’agenoille sor senestre
Pour veoir paradis terrestre.
Ne sot mot, que qu’il s’agenoille,
Que la corde le destouroille
Plus tost que flos de mer ne monte.
Que vous feroie-jou lonc conte ?
Moult trast la nuit pute aventure :
Ou puis s’en va grant aléure,
Jà soit icou qu’à lui empoise,
Et cius se liève qui mains poise.
Renars monta et cil avale :
Ceste partisonz est moult male ;
Car cius en rit et cils en pleure,
Cilz va desous et cilz deseure ;
Cil qui onques ne s’entr’amèrent
En une hureté s’encontrèrent ;
Ysengrins commença à dire :
U irés-vous, Renart bial sire ?
Biax conpères, se Diex vous voie,
Dites quel part en iert la voie.
Cix respont, qui moult sot de frape,