Page:Le Roman du Renart, supplément, 1835.djvu/155

U nuls pechières ne puet estre.
Ysengrins a apercéu
Renart, si l’a bien connéu.
Renart, fait-il, ne te puis croire ;
Car maintes fois, çou est la voire,
M’as decéu par tes mençoignes ;
Or me recontes ci tes songes,
Et paroles ne sai de quoi.
Et Renars respont en requoi :
Sire Ysengrin, or m’entendés :
Savés con je suis amendés,
Et con j’ai cangié ma vie :
Por tout l’or qui est en Pavie
Ne vous feroie cose acroire,
N’à nul autre, s’el’ n’estoit voire.
Por noiant en avés doutance,
Que que j’aie fait en m’enfance,
Or sui preudons, ce vous plevis ;
Car hons qui est en paradis
N’a mestier de mençoigne dire,
Bien le devés savoir, biau sire.
Renart, fait Ysengrins, ne l’ dites ;
N’estes pas encore si cuites
De traïson ne de péchiés
Dont vous estes toz entechiés,
Qu’en paradis sachiés la voie.
Si sai, fait-il, se Diex m’avoie
A toute honor et à grant aise,
Car n’i voi riens qui me desplaise :
Tout a mes cuers quanqu’il desire,
De nule riens ne s’en consire,
Et trestuit li autre ensement