Page:Le Roman du Renart, supplément, 1835.djvu/153

Coment il la puisse tenser ;
Ne set li chaites que il face,
Mais la corde tient et enbrace
Et l’anse dou saiel qui flote ;
Poour a de perdre sa cote.
Or n’i a fors de l’esgarder,
Malvaisement se sot garder.
Que qu’il ert en celle misère
E-vous Ysengrins son conpère,
Que li fains ot dou bos geté ;
Et je vous di en vérité
Qu’il n’i vint pas por Renart querre,
Mais por sa garison porquerre
Au guicet vint, outre se met ;
De grant folie s’entremet,
Car moult saura de la trestorne
S’il sans damaige s’en retome.
L’abéie vet dédiant
Et entor la graigne espiant
Savoir se il trover péust
Cose qui mestier li éust.
Or vait par la cort desduisant
Li Leus à la lune luisant ;
Et si conme il vint près dou puis,
Si escouta, celer ne l’ puis ;
Dedens oï celui grignier
Qui les autres suelt engignier.
Lors ot Ysengrins moult grant joie ;
Bien cuide avoir encontré proie
D’annes u de brebis n d’oés,
Dont il farsisse bien ses joés ;
Mais n’i a riens de quanqu’il cuide ;