Page:Le Roman du Renart, supplément, 1835.djvu/152

Et la corde li destoreille
Qui ert entors le truel entorte,
Et ens ou puic parfont l’enporte.
Or puet boire, se il comande,
Car l’euve a toute en sa conmande.
Crans périls iert dou revenir ;
Or se puet cius por fol tenir
Qui les autres suelt afoler ;
Ne puet ramper, ne puet voler,
Ne porpenser par quel manière
Il se puisse venir arrière.
Diex ! dist Renars, que devenrai ?
En quel guise me contenrai ?
Il m’estuet ci doner paaige ;
Jà me suelt-on tenir por saige.
N’i a noient dou retourner,
Or me covient ci sejourner,
Çou est la fine vérités ;
Se par autrui n’en sui jetés
G’i remanrai je l’ sai de voir ;
Et s’on me puet apercevoir
Deschirés iert mes peliçons,
Des moisnes qui ont les friçons.
A peschier me covient aprendre ;
Ne puis de moi bon consel prendre
Dès que je sui en la rivière
Et ne m’en puis retraire arrière.
Or est Renars en grant angoisse ;
En maint endroit pense et déboise
Conment se porroit consillier
Sans sa gonelle despoillier ;
Mais ne se sot tant porpenser