Car parfonde ert à grant mervelles ;
Un truel i avoit as deus selles ;
Quant l’une iert plainne et l’autre vuide ;
Molt fu faite par grant estuide.
A terre a mise la geline
Renars, et sour le puis s’acline ;
Mais ne se set à quoi tenir,
Car ne puet à l’ewe avenir.
Renars est ore en moult grant painne,
En mainte guise se demainne :
Tramble et tressaut, sa barbe lèche ;
De soif li cuist la barbe et sèche.
Ne puet par nul engien savoir
Com il péust de l’euve avoir.
Liève la teste et les orelles,
Si a véues les deus selles
Pendues sor le puis à destre.
Diex ! dist Renars, çou que puet estre ?
Qui n’os boire et si muir de soi,
Et si n’i a palis ne soi,
Ne chose que l’ me contredie.
Je sui couars, que que on die ;
Mais la male flamme me parte
Ançois que de cest lieu me parte
Se je n’en boic ains que m’esvainnes,
Jà n’en querrai congié as moisnes.
Lors sali por la corde prendre
Là ù il vit le saiel pendre,
Et cuide que d’ewe soit plainne.
Oés con son péchié le mainne !
Si conme il se prist à la selle
