Page:Le Roman du Renart, supplément, 1835.djvu/146

Trestoz troi les ont pris ensamble.
Sire, dist Renars, ce me samble
Que bon feroit partir no proie.
Dist Ysengrins : Je le voudroie.
Et je, dist li Lyons, ausi :
Ysengrins la partira si
Que chascuns, selonc ce qu’il vaut,
Ait droite part ainz qu’il s’en aut.
L’avantage vous en doins or,
Biaus sire, et vous aurez le tor,
Et Ysengrins aura la vache,
Et Renars, qui la proie chace,
Aura le véelet petit :
Il me samble que j’ai bien dit.
Dist li Lyons : Jà vous parra.
La poë hauce, se l’ frapa :
Aus graus en mi le front l’aert
Si doucement le nez li tert
Que le cuir de la grise pel
Li abat desus le musel,
Et Ysengrins le trest arriere,
Qui ne fist mie biele chiere.
Or tost, dist li Lyons, Renart,
Partez ; donez chascun sa part.
Sire, dist Renars, volentiers :
Vostres sera li tors entiers,
Et ma dame la Lyonesse
Ait la vache grasse et epesse :
Se l’ mengera souz sa cortine
Où ele gist en sa gesine ;
Et vostre filz, mi damoisel,
Si aura le petit véel.