LA COMPAIGNIE RENART.
Li Lyons c’on apele Noble
Estoit jadis en un vingnoble,
Au chief d’un bois, en une plaingne ;
Avoec lui ert en sa compaingne
Renars et Ysengrins li Leus.
Toz troi erent moult fameilleus.
Nobles li Lyons baailla ;
Et Renars moult s’en merveilla,
De sa destre poë le saine,
Quant il en voit issir l’alaine :
Sire, dist Renars, qui le flate,
Vous avez moult la pance plate ;
Vous n’avez hui guères mengié ;
Et dist li Lyons : Non ai-gié ;
Mès moult volentiers mengeroie
Se péussons encontrer proie :
Quar fesons une compaignie
Or endroit ci, par foi plevie.
Sire, dist Renars, je l’otroi ;
Chascuns a plevie sa foi
Que par léauté partiront
Itel gaaing comme il feront.
Tuit troi l’ont plevi et juré.
Tant ont ensamble randoné
Qu’au chief del bois truevent un tor
Dont ne préissent nul trésor,
Et une vache et un véel
Truevent pessant en un prael,
