De rendre je vous doins congié.
Saint Pere, dont prenderai-je
Relegion quant je vaurrai,
Puis que de vous congié en ai.
Lors se lieve uns Ospiteliers,
Sages hom ert, s’ot non Reniers.[1]
En haut parla et par compas :
Signeur, dist-il, et haut et bas,
Entendés no peticion,
Et si nos demandons raison.
Li Templier demandent Renart
A avoir par aus en lor part ;
Mais avoir mius nous le devons,
Et par moult de boines raisons,
K’avant fumes-nous k’il ne furent,
Dont encore cartres nos durent
De princes, de Rois vint grans briés,
Et si faisons trop plus de griés,
As Sarrasin que li Templier.
Au besoing somes chevalier
Et maintenons à nos espées
Contre Sarrasins les mellées ;
Et en nostre hospitalité
Ki est plaine de carité,
Sont gari, levé et coucié
Li navré et li deshaitié,
- ↑ Al. Sages hom fu et biaus parliers.
