Le texte de cette page a été corrigé et est conforme au fac-similé.
Si ke li frere Menu viestent de lor Ordne Rousiel fil Renart, en font custode de lor Ordne.
Gardiien en font et custode
Rousiaus fius Renart, tout çou gode,
Si lor proumet que tant fera
Que l’Ordre moutepliera,
Et k’en haut orguel monteront
Od l’autre Clergié et seront.
Mais c’est por nient, il n’iront point,
Trop sunt grief de l’Ordre li point,
Trop lor fist aspre Saint François ;
Si l’eslargissent à le fois
Cil k’en l’Ordre sunt orendroit,
Et metent l’Ordre hors de droit.
C’est par lor custode Rousiel
Fil Renart, Frere Renardiel ;
Mais ains ne se sot si pener
Roussiaus k’il les péust mener
En haut orguel, car asprestés
Ki lor est voisins as costés,
Ne lor laist, car povretés vraie
Tient toute l’Ordre en sa manaie,
De poi mengier, de poi viestir,
De poi dormir d’eure gesir
