C’est d’Infier, l’umaine lignie :
Onques ne fu riens mieus lignie
Con li Sires ligna sa corde,
C’est son Fil cui misericorde
Poons par droit non apieler,
Ki ça jus se vint affubler
Dou sac de nostre humanité
Sour l’or fin de se Déité.
C’est que il prist et car et sanc
En ce saint ventre, en ce saint flanc
La sacrée Virge Marie ;
S’en deffist le voie marrie
D’Infier par le mort k’il souffri.
Ce fist amours ki li offri,
Moult le devons de cuer amer,
Quant pour nous en Crois si amer
Bevrage but, con mort amere
Jamais n’ert nus si fius à mere.
Or revenrommes à le pais,
Car il en est bien tans huimais.
Li Rois a fait lors apieler
Devant lui le cok Cantecler,
Faire le fist pais à Renart.
Atant li parlemens depart,
Fors tant que Renart dist au Roi,
En Passe-Orguel venrés od moi,
Et toute vo gens autressi.
Et li Rois li dist, jou l’otri,
Page:Le Roman du Renart, 1826, tome 4.djvu/410
Le texte de cette page a été corrigé et est conforme au fac-similé.
