Lasses brebis, fuiiés, fuiiés,
Li Leus a ses dens aguisiés
Pour vous mengier et devourer.
Nous no poons bien trop fier
En nos paistres, que maisement
Tienent de nous à Dieu couvent.
Por Dieu ne nos i fions mie,
Car ce seroit double folie :
Soions soigneus de nous garder,
Li mors vient, nous n’avons k’ester ;
Avoec li vient Satans li leus,
De nous mengier tous familleus.
De devot cuer merci crions
A Dieu, et nous merci arons.
C’est que à nous pardonra s’ire
Li Rois des Rois, li très dous Sire ;
Lors n’ara mais Satans pooir
Sor nous, ce vous di-jou por voir.
S’en l’amor Dieu perseverons,
Por noient Satan douterons ;
Mais se li estore ne ment,
Au jour d’ui va mais autrement.
Li Rois a fait pais, cest nos cors
As visces, et s’a bouté hors
Les vertus, s’a mis en ce lieu ;
Renart poi doute le grant Dieu,
Le grant Juge ki Dieu sen fil
Nous tramist pour geter d’escil,
Page:Le Roman du Renart, 1826, tome 4.djvu/409
Le texte de cette page a été corrigé et est conforme au fac-similé.
