A Renart haut non mie bas
A dit tantost Pelés li ras,
Se çou est voirs, tu seras rois,
Ne t’esmaiier, dedens un mois.
Dont fist Renart l’eiwe corner,
Mengier vont apriès le laver
Par le conmant Renart le rous.
Boines gens, ensi est de nous :
Tout somes plain de renardie,
De traïson et de boisdie,
Et de fauseté k’en nous dure,
Et d’envie ki plus est dure
D’un diamant : grief endurer
Fait les siens, conment puet durer
Nus od li ? Trop maint durement
Cuers c’o li est, et durement
Va le grant cemin d’infier dur,
Dont je mie pour lui n’endur
Les paines, ains les endurra
Tant que li Sauverres durra,
Qui dist moult très bien endurrai
Grief à ceus tant que je durrai.
C’est sans fin, bien voel qu’il endurent
Ce grief, s’il n’ont fait ce qu’il durent.
Las ! tuit vivons en grant peril
Jou et tu, et celes et cil ;
Cascuns acroit plus qu’il ne paie,
Dont li Peres cacera paie
Page:Le Roman du Renart, 1826, tome 4.djvu/360
Le texte de cette page a été corrigé et est conforme au fac-similé.
