De despit encontre desdaing :
Se de voir dire ne me faing,
Fouré erent de vanterie,
Et ot çainte par signourie
De manaces une çainture,
Et s’ot par grande envoiséure
De cointise un joli capiel
Sour son cief ki moult li sist biel ;
Et s’ot de vaine glore afice
A sa poitrine biele et rice.
Solers ot de jolieté,
Trenkiés sour or de vanité,
Et cauces de presumption
Faites de viermeil siglaton.
Orgilleus tout si atorné
A Renart od lui enmené
En se nave par le congié
Proserpine ; tout en sunt lié
Par le nave et forment l’ouneurent.
Por lui bienvignier tout akeurent,
Enmi le nave l’ont assis
En un trosne d’or, et puis pris
Congié à Dame Proserpine.
Li vens se fiert par grant ravine
En lor sigle, et li nave ala
Plus tost que quariaus ne vola,
Tant qu’en Noireweghe ariverent
Lés un bos, et dedens trouverent
Page:Le Roman du Renart, 1826, tome 4.djvu/304
Le texte de cette page a été corrigé et est conforme au fac-similé.
