Il et si fil de recaner
Por ceus dou castiel estouner.
Bruiaus li tors i prist à muire
Por ceus dedens grever et nuire.
Lors prist Roeniaus à usler
Il et Grignars. Lors au brouster
Se prisent li chievre et li bous
Por plus grever Renart le rous.
Cascuns assaut au mius k’il set,
Et Ysengrins ki Renart het,
Les amoneste de bien faire.
Entre Alixandre et le roi Daire
N’ot assaut onques tant felon.
Ki lors véist Rinoceron
L’Unicorne conme il s’efforce
Que li castiaus soit pris à force,
Hardis li lupars vistement
Assaut Nobles hardiement.
Li fius le Roi et Leoniaus
Ses freres moult de lor aviaus
I ont, car as glaives se font
Dou castiel sour les murs amont
Gieter ; mais Roussiaus et Grinbiers
Vienent de tors et de traviers
Et lor gent, et cil se deffendent
Sour les murs et fier estor rendent
A ciaus dedens, et reculer
Les font un arpent, et c’est cler
Page:Le Roman du Renart, 1826, tome 4.djvu/210
Le texte de cette page a été corrigé et est conforme au fac-similé.
