Tout surke quanque de cat ist
Dont on par maintes fies dist,
Car qui des boins est, soef flaire.
Et vraiement ne me puis taire,
Che dist Renart, k’un cort sermon
Ne vous face : et ne fist pardon
Jhesus Longin ki le feri ?
Et ne pardona-il ausi
La Magdelaine ses peciés,
Et ciaus par qui crucefiés
Fu repardouna-il sa mort.
Dur cuer a ki de tel recort
N’est adoucis en pieté.
Rois, pour le Sainte Trinité,
Orguel et felounie ostés
De vo cuer, et si vous souffrés
De ceste gent ci metre à fin :
Rois Nobles, on vous tient à fin ;
Mais de plusiours est li recors
Que ce n’est mie trestous ors
Quanqui luist, et bien le moustrés ;
En çou que si grans cruauté
Est en vous. Et li Rois respont
Que c’est por nient, demain morront.
Lors dist Renart au Roi Noblon,
Au mains aront confiession.
Bien le voel, ce respont Rois Nobles
Qui moult par ert cointes et nobles.
Page:Le Roman du Renart, 1826, tome 4.djvu/200
Le texte de cette page a été corrigé et est conforme au fac-similé.
